LA UNION – Dagus a naideklara a natay ti maysa a lalaki kalpasan a tinagtagbat ti nakainomanna idiay ili ti Aringay, La Union.
Ti biktima ket nabigbig a ni Ali Carera Mercado, 28-anyos, residente ti Brgy. San Antonio bayat a ti suspek ket ni Raymalonso Soñega, 27, agindeg iti Brgy. Sta. Cecilia.
Maibasar iti imbestigasion ti Aringay Police Station, naamuan a naginom da Mercado, Soñega ken Ariel Salting iti balay ti naud-udi idiay Brgy. San Simon East idi inkeddeng ni Ariel ti maturog gapu iti nalaus a kinabartek.
Nupay kasta, kellaat daytoy a nabaringkuas gapu iti napigsa a banugbog iti ruangan ti siledna, ngem idi luktanna daytoy ket naimatanganna laengen ti dara-dara a bagi ni Mercado nga addaan iti tama ti pannagbat iti tengngedna.
Ginandatda pay nga itaray ti biktima iti pagagasan ngem pimmusay met laeng daytoy.
Dagus met a tiniliw dagiti otoridad ni Soñega a kangrunaan a suspek iti krimen.
