BR LA UNION – Boluntaryo nga in-surrender ti maysa a lalaki iti nasarakan a maysa nga Unexploded Ordnance, kadagiti otoridad ditoy siyudad ti San Fernando, La Union idi kalman Hulyo 12, 2025.
Agarup alas 5:50 ti malem, maysa a clinical instructor a naka-assign iti Phil. Coast Guard, residente ti Barangay Tanqui ditoy siyudad, iti personal a nagturong iti police station tapno i-turnover iti maysa (1) a pidaso ti narekobre a saan pay a bimtak nga armas kadagiti lokal nga otoridad.
Ti Unexploded Ordnance ket maysa a 20mm a cartridge (CTG 20mm).
Maibasar iti inisyal nga imbestigasyon dagiti otoridad, iti Unexploded Ordnance ket nasarakan ti maysa a karpintero agarup alas 2:10 ti malem manipud iti pagtrab-trabahuan da a pagtaengan ti reportee idiay Barangay Tanqui.
Maipagarop a nakita na daytoy a nakadulin iti uneg ti daan a kabinet.
Kabayatanna, dagus met a naki-koordinar dagiti personnel ti San Fernando City Police Station iti La Union Provincial Explosive Canine Unit 1.
Iti assessment, pinasingkedan ti La Union Provincial Explosive Canine Unit 1 a ti nasao nga item ket maysa a corroded CTG 20mm unexplosive ordinance ket naipasidong iti custodiya da para iti natalged a disposal.
Mainaig ti daytoy, nagpalagip manen dagiti otoridad iti publiko a dagus nga ireport ti aniaman a matakuatan nga eksplosibo wenno armas tapno maliklikan ti anyaman nga aksidente a panagbettak wenno pannakadangran.
