BR LA UNION – Maysa a rason a makitkita ti Presidential Anti-Organized Crime Commission (PAOCC) iti agtultuloy nga operasyon dagiti babassit a Philippine Offshore Gaming Operators (POGO) ket iti saan pay a pannakatiliw ti dadduma a POGO bosses nga agtaltalinaed pay laeng ditoy pagilian.
Segun kenni PAOCC Executive Director Usec. Gilbert Cruz, adu pay laeng dagiti players, POGO workers ken POGO bosses a saan pay a natiliw agingga ita isunga mabalin a daytoy ti kangrunaan a rason no apay a dagiti dadduma a POGO hubs ket agtultuloy a mangisay-sayangkat kadagiti babassit nga operasyon.
Sumagmamano a nasirip dagiti otoridad a pagbal-balinen a POGO hubs ket dagiti resort, condo units idiay Pasay ken uray iti underground parking ket maus-usar a POGO centers.
Maysa pay a rason, segun kadagiti otoridad ket kaadda iti napintas a source dagiti arwaten ken de kalidad nga armas wenno klase ti paltog nga iggem dagiti operators a pangbut-butngan ti PAOCC.
Segun pay kenni Cruz, dagiti POGO hubs ket addaan iti nagarbo a lug-lugan a mabalin a pruweba a nangato ti kalidad iti maaw-awat da manipud iti main source.
Kabayatanna, agyaman ni Cruz nga awanen iti sumagmamano a dadackel nga illegal a POGO hubs ditoy pagilian ken agtultuloy ti panangisayangkat da ti raid tapno matunton dagiti nakalemmeng nga small-scale POGO operators.
