Nakaalerto ken nakasaganan ti Department of Migrant Workers (DMW) nga i-activate ti contingency plan tapno matulongan dagiti Overseas Filipino Workers (OFWs) idiay Taiwan iti kangitingitan ti posible a panagraut ti China iti nasao nga teritoryo.
Inwaragawag ni Migrant Workers Secretary Hans Leo Cacdac a nainget dan a banbantayan ti sitwasyon idiay Taiwan babaen ti pannakikoordinar ti ahensiya iti Manila Economic and Cultural Office (MECO) ken Migrant Workers Offices idiay Taiwan.
Iti biang met ti DMW ditoy Pilipinas, agtaltalinaed da nga alerto tapno masiguro ti kinatalged ken panangsalaknib kadagiti Pilipino nga adda iti nasao nga isla.
Pinaregta met ti ahensiya dagiti OFWs kasta met dagiti pamilya da nga agtalinaed a kalmado ken impormado babaen kadagiti official government channels.
Inaramid ni DMW chief ti waragawagm sumagmamano nga aldaw kalpasan a nagballaag ni AFP chief of Staff Romeo Brawner Jr. kadagiti soldado ti Pilipinas a saganaan ti posible a panagraut idiay Taiwan kasaruno ti kumarkaro a tensyon ken agtultuloy nga agresyon ti China.
