LA UNION – Agtultuloy ti isaysayangkat nga imbestigasyon ken pannakaiproseso ti bagi ni Provincial Disaster Risk Reduction and Management Office (PDRRMO) head Bobby Valdriz kalpasan a kinettelna ti bukodna a biag iti mismo uneg ti opisinana itay laeng alas-7:00 ti agsapa.
Iti inisyal nga impormasyon manipud ken ni PCI John Guiagui, hepe ti San Fernando Police Office, kinunana a nasapa a simrek iti trabahona itay alas-6:00 ti agsapa ni Valdriz.
Nupay kasta, maipagarup a saanna a pinastrek iti opisina dagiti kakaduada.
Segun pay ken ni Guiagui, madama ti panagsagana dagitoy iti St. William Cathedral iti San Fernando City, La Union para iti maisayangkat a misa kadagiti kandidato ti Barangay ken SK Elections inton bigat, idi kellaat a nakangngegda iti maysa a putok ti paltog manipud iti direksion ti opisina ni Valdriz iti Mabanag Hall a kaabay laeng ti simbaan.
Dagusda a tinurong daytoy ket nasangpetanda ti nakadasay ken dara-dara a bagi ti opisial nga adda ti maysa a tama ti bala ti caliber .38 a paltog iti pispisna.
Dukduktalen ita ti pulisia no adda ti napasamak a foul play iti insidente. (PLAD)
