Impaganetget ni Department of Education (DepEd) Secretary Sonny Angara a masapul a matarimaan ti pannakaipatungpal ti Universal Access to Quality Tertiary Education Act, maysa a linteg a mangigarantiya iti libre a matrikula iti kolehio, tapno maikkat dagiti nabaknang nga estudiante ken dagiti laeng maikari ken nakurapay nga estudiante ti maipaayan ti subsidiya.
Segun kenni Secretary Angara, napateg ti adjustment iti pannakabagi ti linteg gapu ta nagbalinen a naingpis dagiti resources para iti basic education sector kalpasan a napalawa ti subsidiya ti kolehio.
Inyarig ti sekretario nga uray dagiti estudiante iti University of the Philippines ket ‘tuition free’ ngem no kitkitaen ket adu kadagiti estudiante iti unibersidad ket naggapu met kadagiti nababaknang a pamilia.
Intudo ni Angara, a maysa metlaeng nga alumnus ti University of the Philippines, a saan a rumbeng nga ag-subsidize ti gobierno kadagiti nabaknang nga estudiante, banag a kunana a maar-aramid iti agdama a pannakaipatungpal ti linteg.
Mainaig iti daytoy, inyunay-unay ti DepEd Chief nga ipamaysa ti gobierno ti panangipaay iti libre nga edukasyon iti kolehio para kadagiti maikari nga estudyante ken lapdan dagiti saan nga agkasapulan iti subsidiya iti baet ti umad-adu a bilang dagiti nakurapay nga estudiante iti kolehio ket agsarsardeng iti kada tawen gapu ta awan pagbayad da iti matrikulada.
Segun iti datos manipud iti Commission on Higher Education (CHED) idi 2023, nasurok a dua a milion nga estudiante ti state universities and colleges (SUC) ti umaw-awat ti free tertiary education iti 200 nga institusion iti intero a pagilian.
