BR LA UNION – Ibilang ti Malacañang a maysa a lapse wenno pagkurangan ti pannakapaay dagiti bangko nga ireport iti Anti-Money Laundering Council (AMLC) dagiti “unusual” cash withdrawals manipud iti confidential funds ti Office of the Vice President (OVP) ken Department of Education (DepEd).
Daytoy ti inwaragawag ni Undersecretary Claire Castro kalpasan a nakiddaw ti reaksiyon na iti testimonya ti dua a sigud a branch manager ti Land Bank seknan iti dadakkel a cash withdrawals nga inaramid ti OVP ken DepEd.
Segun kenni Castro, ipakpakita ti testimonya iti kinapateg ti transparency ken accountability iti pannakausar dagiti confidential funds.
Kinuna pay ni Castro a no ti maysa a transaksiyon ket maibilang nga “unusual” wenno karkarna daytoy ket rumbeng a maamiris ken amwen no daytoy ket kasapulan nga ireport iti AMLC, anyaman ti kasasaad ti akinkukua ti account.
Impaganetget ni Castro nga umdasen dagiti agraraira a linteg, ngem tumaud dagiti parikut no saan a maipatungpal wenno adda dagiti tao a mangigagara nga aglabsing ti linteg para iti personal nga interes.
