Impanamnama ni Presidente Ferdinand Marcos Junior ti panagkumit ti gobierno a tumulong kadagiti marigrigat nga estudyante nga umimbag iti panagadalda.
Daytoy ket kalpasan a pinirmaan ti Presidente ti Academic Recovery and Accessible Learning wenno ARAL Law.
Mamati ni Presidente Marcos a babaen daytoy a learning intervention, dakkel a tulong tapno ad-adda a maporma ti pannakaammo dagiti agtutubo.
Impaganetget ti Presidente a kayat ti administrasionna nga ipaay ti de kalidad nga edukasyon kadagiti agad-adal agsipud ta karbengan da met daitoy.
Inadmitir ti Chief Executive a makapaupay ti report a 75% kadagiti estudiante a Pilipino ti adda iti baba ti minimum proficiency levels iti panagbasa, matematika, ken siensia.
Inaramid daitoy ti gobierno tapno ad-adda a mapapigsa ti sistema ti edukasion ditoy pagilian.
Babaen ti panagpirma iti ARAL Law, maysanto daytoy a wagas tapno maited ti tunggal estudiante iti karbengan iti de kalidad nga edukasion nga accessible ti amin.
Babaen ti linteg, libre ken epektibo ti learning intervention para kadagiti kindergarteners agingga iti Grade 10 iti public education system.
Iti programa ti ARAL, maipasdek daytoy babaen kadagiti tutorial sessions.
Maitunos kadagiti agdama a pagalagadan ti DepEd, ti ARAL Program ket mangtaraken kadagiti estudiante a kas maysa a pakabuklan, a mangpapigsa iti akademiko a pundasionda ken mangpasayaat iti kinaandurda iti sango ti rigat.
Indagadag ni Presidente Marcos kadagiti mangisursuro ken instruktor ti nasao a programa, nga umasidegda kadagiti agad-adal a buyogen ti pannakaawat, isuroda ida a di mangidumduma, ken tarabayenda ida a buyogen ti asi, gapu ta iyegda ti nasaysayaat a masakbayan.
Paregtaen pay ti Presidente dagiti nagannak ken guardians, a mangtaginayon iti silulukat a linia ti komunikasion kadagiti edukador, bantayan ti panagrang-ay ti anakda ken ikkanda ida iti suporta a kasapulan tapno agballigida iti biag.
Awagan pay ti Presidente dagiti LGUs a tumulong a mangpatanor iti natalged ken makaay-ayo nga aglawlaw para kadagiti personal a tutorial ken makitinnulong iti gobierno iti panangitandudo iti programa babaen ti pannakiuman kadagiti potensial a tutor, panangilasin kadagiti kualipikado a kandidato, ken panangparegta kadagiti nagannak nga isali dagiti annakda iti daytoy nga aktibidad.
