Agsapsapul ti gobierno iti private sector partner para iti pannakaibangon ti tallo nga offshore wind terminal nga aggatad ti agingga ₱18 billion. Panggep ti proyekto a mapapigsa iti suplay ti koriente ti pagilian babaen ti offshore wind energy.
Segun ti Philippine Ports Authority (PPA), iringringpasna ti plano a pagbalinen nga offshore wind hub dagiti puerto idiay Mercedes, Camarines Norte; Sta. Clara, Batangas; ken Currimao, Ilocos Norte.
Naited ti umuna a proyektoi ti Port of Mercedes nga aggatad iti ₱2.27 billion, ngem temporario a nataktak bayat a mairingringpas dagiti dokumento para iti construction site. Target pay laeng a mangrugian daytoy ita a tawen ken malpas iti uneg ti 18 a bulan.
Kabayatanna, plano ti PPA ti makitinnulong iti pribado a sektor para iti ₱3.6-billion a proyekto iti Port of Sta. Clara gapu ta marigatan iti ahensia a pondoan daytoy nga agmaymaysa.
Ti kadakkelan ken karirigatan a proyekto ket ti Port of Currimao, a mapattapatta a dumanon ti nasurok ₱12 billion. Masapul ditoy dagiti floating turbines ken dakdakkel nga espasio a nasurok-kumurang 25 nga ektaria.
Iti laksid dagiti karit, agtalinaed iti kumpiyansa ti PPA a makaipaay iti pagilian ti umuna nga offshore wind-generated electricity inton tawen 2028. Kabayatanna, siam laengen a kompania iti nabatbati iti bidding para iti umuna nga offshore wind auction ti pagilian.###
