Nakasagana ti grupo dagiti abogado iti likudan ti maikatlo nga impeachment complaint kontra kenni Vice President Sara Duterte a makisarita ken makipagtrabaho kadagiti dadduma pay a grupo tapno dakamatenda ti reklamo kontra iti bise presidente.
Segun kenni Amando Virgilio Ligutan, uray saanna nga am-ammo dagiti kameng ti sabali a grupo, situtulok a makisarita daitoy kadakuada tapno pagsaritaanda ti reklamo.
Kinunana, gapu ta maymaysa ti panggepda, nakasaganadan a makisarak kadagiti dadduma pay a grupo; nupay nagsisina ti reklamoda, maymaysa ti tarigagayda.
Irepresentar ni Attorney Ligutan ti grupo dagiti abogado ken papadi iti likudan ti maikatlo a reklamo.
Karaman ditoy da Padre Antonio Labiao ken Padre Joel Saballa ti Diocese of Novaliches, Carmelite priests Rico Ponce, Dionisio Ramos, ken Esmeraldo Reforeal; Father Daniel Pilario ti Congregation of the Mission, ken dadduma pay.
Immunan nga inrekomendar ni ACT Teachers Representative France Castro ti miting wenno panagtataripnong iti nagbaetan dagiti tallo a grupo a nangidatag iti tallo a nagsisina a reklamo tapno pagsasaritaan dagitoy.
Paset ni Castro ti Makabayan bloc a nangi-endorso iti maikadua nga impeachment complaint kontra kenni VP Sara.
