BR LA UNION – Imbilin ti Pre-Trial Chamber I ti International Criminal Court (ICC) iti prosecution ken iti defense team ni sigud a presidente Rodrigo Duterte nga isagana dagiti ebidensiya iti sumaruno a bulan.
Iti pammilin, nasken nga agsagana ti agsumbangir a benneg iti anyaman a klase ti ebidensiya a plano dagitoy nga ipresenta.
Inton Abril 4, 2025 nasken nga isumite iti information dagiti nakalap nga ebidensiya, manu dagiti witness agraman salaysay dagitoy para iti biang dagiti prosecutors.
Iti met kampo ni Duterte, addaan da ti agingga Abril 11 tapno isumite iti obserbasyon da iti information nga insumite ti prosecution.
Sungbatan da daytoy nu agpresenta ti ebidensiya wenno mangayab ti bukod a witness iti maisayangkat a confirmation hearing inton bulan ti Setyembre.
Maipapan iti partisipasyon dagiti biktima ket impaayan ti ICC iti Registry ti agingga Abril 2, 2025 tapno mangidatag ti obserbasyon nga adda pakainaigan iti aplikasyon dagiti biktima a makipaset iti panagusig.
Kabilang ditoy iti admission proceedings, proof of identity documents ken legal representation iti agdama a proceedings.
Maipalagip a maibasar iti police records adda iti 6,000 a tattao ti natay iti drug war ngem maibasar iti human rights groups ket umabot iti 30,000 dagiti natay kabilang iti vigilante killings.
Immunan nga imbaga ni Duterte nga aklonenna amin a kaso a maibat-bato kenkuana ken impaganetget ti abogado na a ni Nicolas Kaufman nga iligal ti panang-arestar iti sigud a presidente.
