Inlawlawag ni House Secretary General Reginald Velasco ti impormasion maipapan iti ₱20-M budget para iti maikatlo nga State of the Nation Address wenno SONA ni Presidente Ferdinand Bongbong Marcos inton Hulio 22.
Impaganetget ni Velaso a karaman iti ₱20-M ti gastos para iti panagsagana para iti SONA a nangrugi idi Marso 12, idi nabukel ti SONA task force
Karaman pay iti gastos ti Inter-Agency Coordination Meetings a tinabunuan dagiti nadumaduma a departamento ken ahensia a paset ti panagsagana.
Segun kenni Velasco, ti makan iti aldaw ti SONA ket para kadagiti bisita, internal staff ken external personnel kas iti pulisya a mangmonitor iti seguridad iti aglawlaw ti Batasan Complex kasta met kadagiti Metropolitan Manila Development Authority (MMDA) personnel ken dadduma pay a support staff .
Dinakamat ni Velasco a karaman pay iti supply ti Kamara ti tallo a set ti uniporme para kadagiti 2,000 nga empleado ti House Secretariat a mausar saan laeng nga iti aldaw ti SONA no di ket iti inaldaw a trabahoda.
Kinuna ni Velasco nga adda pay ti bayad para iti kanayonan a personnel ken equipment a mangipasigurado iti seguridad ken kinatalged ti SONA kassta metten iti kanayonan a medical support manipud iti asideg nga ospital.
Innayon ni Velasco a malaksid kadagiti imbitasion ken giveaways, naabangan met dagiti LED walls ken dadduma pay nga alikamen tapno mapasayaat ti audiovisual presentation ken overall ambiance iti uneg ti plenary hall ken Batasan Complex kasta met dagiti dekorasion kas kadagiti potted plants ken sabsabong.
