LA UNION – Inaprubaran ti National Capital Region Wage Board iti kanayunan a P35 iti inaldaw a suweldo dagiti minimum wage earners iti pribado a sektor idiay Metro Manila.
Maibasar iti baro a Wage Order No. NCR-25, epektibo inton Hulyo 17 iti minimum wage rates para iti non-agriculture sector ket agbalinen a P645 manipud iti agdama a P610.
Bayat nga iti agriculture sector, service ken retail establishments nga addaan ti 15 nga empleyado wenno nababbaba ken manufacturing establishments nga addaan ti nababbaba ngem 10 nga empleyado ket ngumato iti P608 manipud iti agdama a P573.
Segun iti wage board, iti baro a minimum wage rates ket para iti normal working hours a saan a lumbes iti walo oras kada aldaw.
Maipalagip a sakbay a naaprubaran iti kanayunan a suweldo, nangidatag ti naduma-duma a labor groups ti 3 a petisyon iti wage board para iti wage adjustments manipud P597 agingga P750.
Naudi a nangipatungpal ti panagngato ti suweldo idiay NCR idi Hulyo 16, 2023 babaen ti P40 nga umento.
