Pinasingkedan ti Department of Justice nga opisial ken naan-anayen a naiyalis iti ahensia babaen ti Witness Protection Program iti kustodiya kenni sigud a Department of Public Works and Highways Bulacan 1st District Engineer Henry Alcantara.
Kasaruno daytoy ti pormal a pangisubmitirda ti surat kenni Senate President Vicente Sotto III seknan iti panangiyalis ti kustodiya iti sigud nga opisial.
Addaan ni Alcantara iti ‘protective custody’ ti nasao a programa ken saanen a naibinglay iti eksakto a lokasion a pannakaiturunganna.
Maysa isuna kadagiti napili ti departamento nga agbalin nga ‘state witness’ iti agtultuloy nga imbestigasion iti flood control.
Nagbalin met nga state witness da sigud a Public Works Undersecretary Roberto Bernardo, Gerard Opulencia, ken ti kontratista a ni Sally Santos.
Impasigurado ti ahensia nga agtaltalinaed daytoy a silulukat no kasapulan a sumango ni Alcantara kadagiti dadduma nga ahensia.
Panggep iti pannakaiyakar ti kustodiya ken panangipasidong iti programa ket tapno masigurado a mabukel dagiti kaso a maipila kontra kadagiti karaman nga indibidual.###
