LA UNION – Inarestar dagiti kameng ti Bacnotan Police Station iti maysa a lalaki gaputi maipagarop a panag-probokar na, babaen iti panangkarit kadagiti aglabas a motorista.
Nabigbig ti suspek iti nagan a Mario Arellano, agtawen ti 51, awanan asawa, residente ti Brgy. Lisqueb, Bacnotan, La Union.
Immuna ti daytoy, nag-report iti pulisiya iti maysa a biktima, managan Christopher Tadina, 45-anyos, addaan asawa, residente ti Brgy. Dallanagayan Este, City of San Fernando, tapno i-reklamo iti suspek ti physical injury.
Maibasar iti report, hinarang ken maipagarop a dinanog isuna ti suspek nga armado ti steel knuckle bayat nga agman-maneho ti motorsiklo ken dumal-dalyasat iti Barangay Road ti Zaragosa, Bacnotan.
Iti panagresponde ti Bacnotan Police, nadanon da iti suspek a magmagna iti sangwanan ti Nagsaraboan Barangay Hall agturong iti laud a direksiyon, kalpasanna, naaktuan da iti suspek nga agprob-probokar ken kar-karitenna dagiti aglabas a motorista.
Maipagarop a nangipakita ti kina-bayolente idi arestaren dagiti pulis. Nupay kasta, babaen ti tulong dagiti sumagmamano a residente, natiliw iti suspek ken naiturong iti police station.
Natiliwan pay ti maysa nga small plastic sachet a maipagarop a shabu, agdagsen ti 0.07 grams ken agbalor ti P500, ken drug paraphernalia a nakita manipud iti na-rekisar nga sling bag daytoy.
Iti suspek ket sumangsango iti kaso a Physical Injury ken panaglabsing ti RA 9165 wenno Comprehensive Dangerous Drugs Act of 2002.
