Nangipila ti ”not guilty plea” ni Venezuelan President Nicolás Maduro para kadagiti kaso na nga adda pakainaigan ti narco-terrorism, drug trafficking, ken ilegal a panagtagikua kadagiti armas.
Daitoy ket kalpasan met iti kontrobersyal nga operasyon ti Estados Unidos idi Enero 3 iti pagilian da nga indauloan ni US President Donald Trump.
Kadwa ni Maduro iti arraignment iti asawa na a ni First Lady Cilia Flores ita nga aldaw ti Lunes (aldaw idiay Amerika) iti maysa a korte idiay Manhattan, New York.
Impaganetget na nga isuna latta ti lehitimo a Presidente ti Venezuela ken inawagan na ti pannakaarestar kenkuana kas ilegal kasta met nga ibilbilang na ti bagi na a prisoner of war.
“I am innocent. I am not guilty. I am a decent man”
Napagammoan a ti agassawa ket posible a maibalud iti tungpal-biag apaman mapaneknekan a nagbasol, pakairamananen ti panakikumplot da iti narco-terrorism ken panagtagikua kadagiti machine guns ken dadduma pay a makadadael nga armas.
Kabayatanna, kadkadlaw met ti suot ni Maduro iti courtroom a naka-tsinelas ti orange, neon orange a t-shirt, suot ti blue-shirt, ken beige pants.
Uray pay nu kastuy ket saan metten a kummiddaw ti defense counsel ni Maduro ti piyansa ken kinuna a sangwen da lattan ti inawagan da a panagdukot babaen ti militar.
Maipalagip a ti nasao nga operasyon nga indauloan ni U.S. President Donald Trump ket nakagun-od ti nalawa a panagkontra kadagiti nagduduma a pagilian ken 12 pay kadagitoy ket inawagan ti inaramid na kas ”crime of aggression.”
Nagpakdaar pay ni U.N. Secretary-General António Guterres a ti pannakaarestar kenni Maduro ket mailabsing ti International Law.
Naipadamag a nasurok 40 a tattao ti natay iti raid, ken napartuat manen dagiti damag seknan ti posibilidad a maibilang daitoy kas war crimes.
Iti ruar met ti hukom ket napartuat ti bassit a gulo ti nagbaetan dagiti tagasuporta ken kalaban ni Maduro.
Manaig kadaitoy ket nagpakdaar met ti Presidente ti Colombia a ni Gustavo Petro maipapan iti panangusar na ti militar apaman maaramid ti kapada nga addang kontra kenkuana.
