SAN JUAN, LA UNION — Kumidkiddaw iti tulong ti maysa a mannalon idiay Barangay Quidem, San Juan, La Union kalpasan a madadael iti paset ti talon a renrentaan na gapo iti mapapati a panag-spray ti herbicide.
Personal a nagturong ditoy istasyon ti Bombo Radyo La Union ni Redentor Pacquing Lloveras, 43-anyos, awanan-asawa, ken residente ti Barangay Legleg, San Juan, tapno ipadamag ti pannakadadael iti atiddog a paset ti kapagayan na.
Inladawan na dagiti apektado a mula ket nangrugin nga agmaris ti kiyaw (yellow) kasta met dagiti senyales iti pannakatay da. Maseknan ti biktima iti pannakalugi a patauden ti problema, nangruna ket makitaltalon laeng isuna.
Masdaaw isuna agsipud ta inaldaw met a banbantayan na dagiti pagay, ken kellaat lattan a nadadael dagitoy. Pagaropen na a rabii iti operasyon iti nangperdi ti aganay sanga-kilometro na a talon, kas maibasar iti hilera iti tambak a perdisyon.
Agpanpanawagan ni Lloveras kadagiti organisasyon ti mannalon ken lokal a gobierno para iti tulong. Ikidkiddaw na pay iti patas nga imbestigasyon tapno madakamat nu sino a talaga iti responsible ken agsungbat iti pannakadadael iti paset ti talon na.
Kabayatanna, agtaltalinaed paylaeng nga alegasyon dagiti waragawag ni Lloveras agingga awan pay iti umiso a beipikasyon manipud kadagiti maiyannatop nga otoridad.
