LA UNION – Natay iti maysa a trainee ti Philippine Marine Corps bayat ti swimming lesson ken practical application idiay Ternate, Cavite idi Miyerkoles, Hunyo 26, 2024.
Nabigbig iti biktima a ni candidate trooper Joel V. Jimena Jr. ti Basic School Marine Barracks Gregorio Kim idiay Ternate, Cavite.
Maibasar iti imbestigasyon ti pulisya, iti biktima ket kellaat a napukawan ti puot iti kangitingitan ti training.
Dagus a naiturong ti trainee iti ospital ngem saanen a nakapuot pay. Naideklara a dead on arrival idiay San Lorenzo Ruiz Hospital.
Segun kadagiti kakadwa a trainee ti biktima, awan ti hazing wenno panagabuso a napasamak agsipudta ti panagsanay da ket nakasentro iti physical conditioning.
Babaen iti ocular inspection, nakumpirma ti pulisya a dagiti pasilidad iti uneg ti marine base ket natalged ken naurnos.
Dagus a nangidanon ti pannakipag-ladingit iti Philippine Marine Corps iti pamilya ti trainee.
Iti agdama, maur-uray iti resulta ti autopsy iti biktima.
