Agdagup iti 108,767 nga ektaria a talon ti pagay ditoy pagilian ti mabalin a maapektaran gapu iti panangdadael ti bagyo a Julian, maibasar iti datos manipud iti Philippine Rice Information System.
Dakkel a porsiento daytoy ket manipud iti rehion ti Cagayan Valley a dumanon agingga iti 51,864 nga ektaria.
Sumaruno ti Ilocos Region nga addaan iti mapattapatta a 46,911 nga ektaria a maapektaran.
25,731 nga ektarya ti naggapu iti Ilocos Norte idinto a 21,180 nga ektaria ti naggapu iti Ilocos Sur.
Iti Cordillera Administrative Region, manamnama a maapektaran ti dandani sangapulo ribu nga ektaria a talon ti pagay.
Buklen daytoy ti 4,238 nga ektaria iti probinsia ti Abra ken 5,754 nga ektaria iti probinsia ti Apayao.
Kabayatanna, basar iti agdama a datos nga iggem ti Philippine Rice Information System, dakkel a paset dagiti standing crops ditoy pagilian ti adda iti ripening stage wenno dandanin maapit.
Addaan daytoy iti dagup a 73,823 nga ektaria.
34,944 nga ektaria met ti adda iti reproductive stage idinto a 66,154 nga ektaria ti naapit sakbay ti panagdadael ti bagyo.
