LA UNION – Siniguro ti gobyerno a namnamaen ti publiko nga agbalin a napaspas iti panag-proseso ti Bureau of Customs (BOC) iti balikbayan boxes, apaman a sumangpet dagitoy iti pantalan ti pagilian.
Daytoy iti inwaragawag ni Finance Secretary Ralph Recto iti sango ti manamnama a panagirut ti traffic kadagiti kargamento a sumrek iti pagilian bayat nga umadanin ti paskua.
Segun iti sekretaryo, iti agdama ket awan ti mapas-pasaran a problema iti pantalan.
Nu adda man kunana, dagus da a pagsasaritaan daytoy kadwa dagiti opisyal ti Bureau of Customs (BOC) tapno dagus a masungbatan.
Innayon pay ni Recto a siguradwen da nga awan ti agbalin a problema kadakuada ken on time a makarwar iti pantalan dagiti package ti publiko, tapno agbalin a naragsak ti paskua dagiti Pilipino.
