Impakdaar ti Department of Agriculture (DA) a posible a maipasdek ti price ceiling ti bagas no agtalinaed a nangato ti presiona.
Immuna nga inwaragawag ni Agriculture Secretary Francisco Tiu Laurel Junior a mangrugi inton Enero 20, 2025, ipatungpaldan ti maximum SRP a P58 kada kilo kadagiti imported a bagas.
Ti panggep daitoy ket tapno malapdan ti panagngato ti presio ti bagas kadagiti merkado.
Ngem no agtalinaed a nangato ti presio ti bagas, inrekomendar ti DA, agraman ti Department of Trade and Industry (DTI), ken ni Presidente Ferdinand “Bongbong” Marcos Junior a maaramid a price ceiling ti maximum SRP a P58 kada kilo tapno madusa dagiti agar-aramid gapu iti pananglabsingda.
Kinuna ti DA a repasuenda ti maximum SRP iti kada bulan nu agtalinaed latta a nangato ti presio ti bagas nupay nababa ti taripa dagiti imported rice iti 15% manipud 35%.
Segun iti departamento, rugiandan ti implementasion ti P58 per kilo maximum SRP ti bagas idiay Metro Manila nga agserbi a price ceiling tapno masigurado a saan a lumbes iti P10 kada kilo ti dagup a ganansia dagiti importers, traders, ken retailers.
Kinuna pay ni Laurel a mabalin a bumassit ti maximum SRP inton Pebrero gapu ta bumabbaba ti presio ti bagas iti international market.
Nagpakdaar ti ahensya a masapul nga ilawlawag dagiti retailer ti presio no lumabesda iti maximum SRP.
