LA UNION – Kinumpirma ni Presidential Anti-Oraganized Crime Commission (PAOCC) Executive Director Gilbert Cruz a ti Chinese national a ni Huang Zhiyang iti boss of all bosses ti Philippine Offshore Gaming Operators (POGOs) a karaman kadagiti kriminal nga aktibidad.
Segun kenni Cruz, ni Huang met laeng ti timmulong kenni dismissed Bamban, Tarlac Mayor Alice Guo tapno makaala ti hotel accommodation idiay Singapore.
Ngem saan metten a kinumpirma ti PAOCC official nu ni Huang met laeng ti timmulong iti naikkat a mayor tapno makapuslit ditoy Pilipinas.
Imbaga pay ti opisyal a ni Huang ket agtagikua ti 5 a pasaporte, a nadiskubre iti insayangkat da a raid iti maysa a villa idiay Fontana Leisure Park, Clark Freeport Zone, Pampanga idi Hunyo.
Immuna ti daytoy, idi Martes ket imbaga ni Senator Jinggoy Estrada a ni Huang Zhiyang nga iti agdama ket adda idiay Taiwan iti posible a gangannaet nga ibagbaga ni Alice Guo a maysa kadagiti timmulong kenkuana tapno makalibas ditoy Pilipinas.
