LA UNION – Mamati dagiti senador a saan a mabalin nga aramiden nga state witness ni suspended Mayor Alice Guo kadagiti kaso nga adda pakainaiganna iti illegal a Philippine Offshore Gaming Operators wenno POGOs.
Inlawlawag ni Senator Sherwin Gatchalian a saan a mabalin a tumakder nga “state witness” ni Guo agsipudta nadagsen dagiti inaramid na a panaglabsing, gaputa dackel iti nagbalin a papel na iti operasyon dagiti Philippine Offshore Gaming Operators HUB kangrunaanna kadagiti dokumento a nakapanagan kenkuana.
Ni Guo iti kangrunaan a maimam-mameg iti Hongsheng POGO hub idiay Tarlac agsipudta isuna ti nag-apply ti “Letter of No Objection” ken dadduma pay a permits iti local a gobyerno.
Impaganetget na a ti mabalin ken kwalipikado nga agbalin nga “state witness” ket iti “least guilty” iti napasamak a krimen.
Kabayatanna, kontra met ti Presidential Anti-Organized Crime Commission wenno PAOCC nga agbalin nga state witness ni suspended Bamban, Tarlac Mayor Guo, agsipudta iti agdama, ni Guo iti makitkita a “most guilty” nu maipapan iti operasyon ti human trafficking ken scamming idiay Bamban, Tarlac ken posible pay idiay Porac, Pampanga.
Ngem nu bilang man kuna ni PAOCC spokesperson Winston Casio, kasapolan nga ipaay na dagiti kiddawen da: Umuna, ibutaktak na amin nu siasino dagiti utek a foreign nationals iti nasao a camp farm; maikadwa, mangipaay iti natitibker a testimonya ken documentary evidence a mangpaneknek u siasino dagiti agdama ken sigud nga opisyal ti gobyerno a tumul-tulong kadakuada tapno mabukel iti nasao nga scam farm .
Segun kenni Casio, saan a mabalin a maipasdek ti POGO compound iti kantidad a P6.2 bilyon nga awan ti timmulong kadakuada.
Innayon na a nu iti testimonya ni Guo ket tapno itudo laeng dagiti banag nga ammo dan ken addan nga iggem da nga ebidensya, saan da nga ipalubos nga aramiden nga state witness iti suspendido a mayor.
