BR LA UNION – Binilin ni Presidente Ferdinand Marcos Jr. dagiti maseknan nga ahensya ti gobyerno idi kalman, Sabado, Peb. 28, a siguradwen ti kinatalged dagiti Pilipino idiay Middle East kasaruno iti serye ti panagatake idiay Iran kontra kadagiti base militar ti Estados Unidos idiay Gulf Arab states.
Segun iti Department of Foreign Affairs (DFA), ti agdama ket awan iti naipadamag a Pilipino nga apektado wenno nasaktan iti kumarkaru a tensiyon idiay Middle East.
Maipalagip a nagramot ti krisis kalpasan ti inaramid a joint missile attack ti Amerika ken Israel, banag a saan met a pinalabas ti Tehran.
Iti sabali a bangir, inallokoy ti diplomatic mission ti Pilipinas idiay United Arab Emirates (UAE), dagiti Pilipino nga agtalinaed a kalmado ken padaanan dagiti opisyal nga abiso manipud iti gobyerno ti UAE ken iti embahada wenno konsulado ti Pilipinas.
Idiay Tel Aviv, binalakan ti embahada ti Pilipinas dagiti Pilipino nga agtalinaed iti uneg ti balay ken agsagana iti posible a panagturong kadagiti naituding a shelter nu agtultuloy a kumaru ti sitwasyon.
Mapatta-patta nga adda aganay 30,000 a Pilipino a mangmangged ti adda idiay Israel, kaadwan ket caregivers.
Kabayatanna, nasurok 1,000 a Pilipino ti adda idiay Iran.
Nangiruar iti kapada a palagip iti Embahada ti Pilipinas idiay Kuwait, ken nabalakadan dagiti Pilipino nga agtalinaed iti balay wenno natalged a lugar, siguradwen nga adda umdas a baterya dagiti mobile phone, ken liklikan ti agiwaras ti biddut nga impormasyon.
Immuna ti daytoy, kinuna ni U.S. President Donald Trump iti maysa a video post iti social media a nangisayangkat ti U.S. ti “major combat operations” idiay Iran ken inakusaranna ti Tehran nga agtultuloy ti nuclear program daytoy.
Nagpanawagan pay ni Trump kadagiti Iranian nga agawen ti bileg ken turay manipud iti bukod da a gobyerno.
