Binilin ni Presidente Ferdinand Marcos Junior ni Department of Health (DOH) Secretary Ted Herbosa a siguraduen a saan a maputed ti serbisio ti Philippine Health Insurance Corporation wenno PhilHealth uray awan ti subsidy manipud iti 2025 national budget.
Iti naangay miting sadiay Malacañang ket impaganetget ni PBBM a saan koma nga apektaran ti zero-budget allocation ti PhilHealth ti pannakaipaay ti serbisio ti salun-at.
Maipalagip nga idi napan a Disiembre idi napirmaan ti national budget ket impanamnama ti Presidente nga agtultuloy ti panangipaay ti PhilHealth iti serbisio iti laksid ti kinakurang ti subsidy ti ahensya.
Maigiddato iti dayta, pinasingkedan manen ti Presidente ti panagkumit ti gobierno a mangipamaysa kadagiti social services, agraman ti edukasion, salun-at, ekonomia, imprastruktura, ken agrikultura.
Pinaregta ti Presidente ni Herbosa a mangipamaysa iti atension ti DOH a ‘cure to prevention’ wenno ti panangagas nga agturong iti pananglapped iti sakit.
Kabayatanna, naital-o met kinapateg ti digitalization iti DOH tapno mapasayaat ti service delivery ken mapasayaat ti efficiency iti ahensia.
