Balligi a naisalakan dagiti kameng ti Coast Guard Clearing Out Post (COP) Bauang, kakadwa dagiti Deployable Response Group (DRG), Special Operations Unit-North Western Luzon, Coast Guard Medical Clinic-North Western Luzon, ken dagiti dadduma pay a volunteers ti malmalmes a lalaki idiay Brgy. Taberna, Bauang, La Union.
Kabayatan ti Baywatch Patrol operations iti baybay ti nasao a barangay kas paset ti Semana Santa ken SUMVAC 2025 activities, napansin dagiti personnel manipud PCG team ti maysa a beachgoer nga agkidkiddaw ti tulong, agarop 20 a metro manipud iti kosta, dagos nga insalakan ti grupo ken balligi da a naiturong ti kadaratan iti biktima.
Tinaming daitoy dagiti medical personnel manipud CGMED a nangipaay ti madagdagos nga atensyon medikal.
Nabigbig ti naisalakan a ni Mr. Jay Mendoza, 23-anyos a residente ti Baguio City. Napasingkedan a natalgeden ti kasasaad na ken adda itan iti good physical condition kalpasan ti insidente.
Inlawlawag ni Mr. Mendoza a naguyod isuna ti alon bayat nga aglanglangoy a nangigubuay met ti gistayan a pannakalmes na.
Kalpasan a masigurado ti kasasaad salun-at ti biktima, naiturnover ni Mr. Mendoza iti pamilya na ken intultuloy met ti PCG ti Baywatch Patrol Operations iti paset ti kabaybayan ti probinsya.
