LA UNION – Kinanselar ti Department of Foreign Affairs (DFA) iti Philippine passport ni dismissed Bamban Mayor Alice Guo.
Iti maysa nga statement, kinumpirma ti DFA a nagbalin nga epektibo iti kanselasyon ti pasaporte ni Guo idi Setyembre 30 agdama a tawen, kalpasan a nag-match iti biometrics na iti Chinese passport holder a ni Guo Hua Ping iti files ti National Bureau of Investigation.
Maipalagip nga immandar ti Palasyo ti Malacañang a kanselaren iti pasaporte ni Guo kadwa dagiti kakabsat na nga isuda Wesley ken Shiela agraman ni Cassy Ong nga agpapada nga adda pakainaigan da iti POGO hub idiay Porac, Pampanga kalpasan naglibas dagitoy a rimuar ti Pilipinas idi Hulyo.
Nagkari met ti DFA nga ipatungpal ti seguridad ken integridad iti panagisyu iti PH passport ken siniguro na iti publiko nga i-refer da iti law enforcement agencies ken prosekusyon ti anyaman nga ilegal nga aplikasyon ken panagala iti pasaporte.
Inlanad pay ti ahensiya nga ipatungpal na iti Zero Tolerance Policy kadagiti unscrupulous individuals a saan a legal a dumaldalan iti umno nga aplikasyon ti pasaporte.
