BR LA UNION – Opisyal a binaliwan ti Philippine Navy iti Naval Forces West ken nare-organisa kas Western Naval Command tapno agpokus iti security concern idiay West Philippine Sea (WPS).
Iti sidong ti baro nga istruktura daytoy, nabilin iti Western Naval Command a papigsaen dagiti maritime security operations na idiay western seaboard ti Pilipinas iti tulong ti kanayunan a personnel.
Malaksid iti dackel a paset ti WPS ken territorial sea ti Pilipinas idiay western seaboard, sakopen pay ti hurisdiksyon ti nasao a command iti maritime area nga adda iti aglawlaw ti Pag-asa Islands ken Ayungin Shoal.
Karaman ditoy iti BRP Sierra Madre, iti barko a panggubat a naisadsad idiay Ayungin tapno agserbi kas military post.
Kas kangrunaan a naval command nga akin-sakop iti WPS, idaulwanna iti serye ti maritime patrol operations ken siguradwen a mabantayan iti kabaybayan, bahura, ken dadduma pay a maritime feature iti sidong ti teritoryo ti pagilian.
Iti mensahe ni Navy Flag Officer-in-Command Vice Admiral Jose Ma. Ambrosio Ezpeleta kagiddan ti opisyal a seremonya, impaganetget na iti kasapolan a mapalawa pay ti sakop ken mandato ti navy, maiyannurot iti itudtuding ti Comprehensive Archipelagic Defense Concept.
Inallokoy ni Western Naval Command Commander Commodore Vincent Sibala dagiti personnel nga agbalin a natibker iti panangakem ti pagrebbengan dagitoy.
