BR LA UNION – Kinumpirma ti Philippine National Police a problema iti electrical wiring ti makagapo ti uram iti maysa a pasdek iti uneg ti Camp Crame.
Segun kenni PNP Public Information Office Chief Col. Randulf Tuano, nauram iti ballistic testing area ti Forensic Group Office agarop alas 5:30 ti malem idi Biyernes.
Napartak met a nagresponde ti fire unit ti Headquarters Support Service iti uneg ti Camp Crame .
Timmulong met dagiti bumbero a naggapo iti lokal a gobyerno ti Quezon City ken San Juan City.
Ti uram ket nagpaut ti aganay 23 a minuto sakbay a naan-anay a nasebseban.
Impadamag ti PNP nga awan ti naireport a natay wenno nasugatan iti insidente.
Mapatta-patta nga umabot iti nasurok 300k iti balor dagiti nadadael iti napasamak nga uram.
