Nagparang iti House hearing ni Police Major General Romeo Caramat Junior, mapabpabasol a nabayadan tapno ikanta ti anomalya ti war on drugs kasukat ti pannakadutokna kas Philippine National Police (PNP) chief.
Karaman ni Caramat kadagiti resource persons bayat ti umuna nga aldaw ti hearing iti mapapati a pannakaisilpo dagiti Philippine Offshore Gaming Operators (POGO) kadagiti extrajudicial killings (EJKs) a naaramid iti sidong ti war on drugs ti administrasion ni Duterte.
Immunan a kinuna ni House Committee on Dangerous Drugs chairperson Ace Barbers a manamnama ti kaadda ni Caramat iti hearing, kagiddan dagiti dadduma pay a nangato ti ranggoda nga opisial ti kapulisan ken opisyal ti Philippine Amusement and Gaming Corporation.
Sakbay ti panagimbestigar ti Kamara, inakusaran ni Senador Ronald “Bato” dela Rosa ti administrasion ni Marcos a nangpilit ken ni Caramat a mangted iti testimonia kontra ken ni dati a Presidente Rodrigo Duterte mainaig kadagiti natay iti drug war.
Segun met kenni National Intelligence Coordinating Agency director general Ricardo de Leon ken ni Ako Bicol Representative Zaldy Co, ni Caramat ti nagpresenta iti “tell-all” mainaig kadagiti natay iti drug war, kasukat ti panangdutok kenkuana kas hepe ti PNP ni Presidente Ferdinand Marcos Jr.
Maimbestigaran ti International Criminal Court (ICC) ni Duterte ken dadduma pay a top officials ti administrasionna gapu iti bayolente war on drugs a nakaigapuan ti rinibo a natnatay.
Dumanon ti official police records mainaig ti war on drugs fatalities iti 6,000 ngem ikalintegan dagiti human rights group a ti bilang ket mabalin a dumanon agingga iti 30,000 pakairamanan dagiti vigilante killings.
Nupay kasta, inpetteng ni Duterte nga saan a sakop ti ICC ti pagilian a Pilipinas gapu iti unilateral withdrawal ti Manila iti Rome Statute idi Marso 2019.
