LA UNION – Impasigurado ti Provincial Tourism Office (PTO) ditoy La Union nga agtultuloy ti pammalagip kadagiti tourism related establishments seknan iti nainget a panangipatungpal dagitoy iti minimum health standards.
Daytoy ket kagiddan ti agtultuloy a panagawat iti probinsya kadagiti turista manipud naduma duma a paset iti Luzon.
Iti interview ti Bombo Radyo La Union kenni Provincial Tourism Officer Art Cortez, kinunana a saan nga agsarsardeng ti monitoring team iti panangwanawan kadagiti tourism related establishments tapno masiguro a sumursurot dagitoy kadagiti allagaden nga inyetnag ti DOH ken IATF.
Daytoy ket iti tarigagay a maliklikan ti transmission iti Covid-19 kadagiti tourism establishments.
Kagiddan iti panangikagumaan nga ibangon iti ekonomiya ditoy probinsya manipud iti epekto ti pandemya ti Covid-19, mangnamnama iti sektor ti turismo nga agtultuloyen ti panagdur-as dagitoy babaen iti panangbalanse iti ekonomiya ken salun-at.
Kabayatanna, agtultuloy pay iti koordinasyon ti PTO kadagiti travel and tour agencies ditoy probinsya tapno maipasigurado a naannayas ken natalged a makastrek dagiti turista ken tapno maliklikan ti pannakalabsing iti border entry protocols.
