LA UNION – Pa-imbestigaran ti provincial board ti La Union dagiti reklamo a naawat da maipapan iti saan nga umiso a pannakausar dagiti farm facilities a naiwaras kadagiti mannalon iti probinsiya.
Nairuar ti nasao nga isyu kabayatan ti sesyon ti Sanggunian Panlalawigan idi kalman, nga adda dagiti mannalon a saan a mairan-ranud kadagiti nasao a pasilidad gaputa maipagarop a buk-bukodan dagiti dadduma ken maipagarop pay nga ipapa-idam dagiti sumagmamano a barangay officials partikular dagiti barangay kapitan.
Gaputi daytoy, insingasing ni Board Member Reynaldo Mosuela nga imbestigaran ti nasao nga isyu tapno maamwan nu siasino ti rumbeng a pagsungbaten iti reklamo dagiti mannalon.
Impaganetget met ni Vice-Gov. Aureau Nisce, saan a nagkurang ti opisina na iti panag-palagip maipapan iti pannaka-aramat dagiti farm facilities.
Kinuna na a dagiti nasao a pasilidad pangtalon ket saan a kukua ti barangay kapitan wenno siasinuman nga opisyal ti barangay, nudiket kukua iti sibububel a barangay.
