BR LA UNION – Imbinglay ni House Deputy Majority Leader ken La Union Rep. Paolo Ortega V dagiti baro a nagan a nakaawat ti confidential funds manipud iti Office of the Vice President (OVP) ken Department of Education.
Sumagmamano kadagiti naisurat a listaan ket dagiti apelyido a “Magellan”, “Fionas” ken “Ewan”.
Innayon ti mammanday-linteg a dagiti nagan a kas ti Honeylet Camille Sy, Feonna Biong, Feonna Villegas, ken Joel Linangan ket benepisiaryo ti P500 million a confidential funds ti OVP.
Idinto a ti nagan da Fiona Ranitez, Erwin Q. Ewan, Ellen Magellan, Gary Tanada ket nakaawat iti paset ti P112.5 million confidential fund manipud DepEd.
Awan ti opisyal a petsa ti pannakayanak, kasar, wenno petsa ti pannakatay dagiti nadakamat a nagan manipud iti Philippine Statistics Authority.
Impaganetget ni Ortega a saanen a nakakat-katawa dagiti natakuatanda a nagan gaputa iparangarang na nu kasatnu ka-seryoso ti gobiyerno iti disbursement ti kuarta dagiti umili.
Maipalagip nga idi Disyembre napalabas a tawen, nagsumite ti House Committee on good government and public accountability iti 1,992 nga indibidual a karaman iti saan nga umiso a pannakausar ti confidential fund ti OVP.
Maibasar met iti panagsukimat ti PSA a 670 kadagiti 1,992 a nagan ti maipada iti record ti PSA.
Bayat a 1,322 kadakuada ti awanan ti birth records; 1,456 ti awanan ti marriage records ken 1,593 iti awanan ti death record.
