Nangisayangkat ti Philippine Navy iti unilateral exercise idiay West Philippine Sea (WPS), a panggep a pasayaaten ti operational efficiency dagiti warships iti baet ti kimmaro a tension gapu iti agtultuloy a kaadda ti China vessels iti rehion.
Dagiti exercises nga indauluan ti BRP Antonio Luna frigate ket nairanta a mangpasayaat iti kinasagana ken panagtitinnulong dagiti naval personnel.
Naisayangkat dagiti drills iti asideg ti Bajo de Masinloc nga adda iti uneg ti exclusive economic zone (EEZ) ti Pilipinas.
Daytoy nga addang ket kasaruno iti panangipila ti diplomatic protest ti Pilipinas kontra iti kaadda ti Chinese Coast Guard (CCG) vessel, a naawagan iti ‘monster ship,’ idiay kabaybayan ti Zambales. Maigiddato iti dayta, kiniddaw ti Pilipinas ti pannakaikkat ti barko ti China, nga adda sadiay sipud pay idi rugrugi ti Enero.
Iti laksid dagiti protesta, nagtalinaed ti barko idiay Zambales, a nangtignay iti kanayonan nga addang manipud iti Philippine Coast Guard (PCG) ken militar ti Pilipinas.
Kabayatanna, aktibo a banbantayan ti Philippine Coast Guard ti sitwasyon, usar da ti barko a BRP Gabriela Silang a nabiit pay a nagchallenge iti barko ti China, a nagkuna nga adda daitoy iti di kumurang 70 nautical miles manipud iti kosta ti Zambales .
Dinakamat pay ti PCG a ti kaadda ti barko ti China ket maikontra iti Philippine Maritime Zones Act, ti United Nations Convention on the Law of the Sea (UNCLOS), ken ti 2016 Arbitral Award a nangdismis iti nasaknap a panagtagikua ti China kadagiti kabaybayan a mangsaklaw iti WPS.
Nupay kasta, inlawlawag ti China a ti tignayna ket suportado ti history ken international law kasta met nga inlaksidda ti 2016 a pangngeddeng.
