Saan matanggap da House Deputy Minority Leader ken ACT Teachers Party-list Representative France Castro ken Kabataan Partylist Representative Raoul Manuel ti P12B budget cut ti Department of Education para iti 2025.
Impaganetget ni Castro, ipakita daytoy ti anti-education ken anti-poor policies ti administrasion.
Intudo ni Castro a kasano a mapalag-anan ita ti krisis ti panagadal no makissayan met ti pondo para iti edukasion, kas iti P10B a cut manipud iti computerization program a dakkel a problema kadagiti estudiante a desperado a makasabet iti digital age.
Makaupay met para kenni Representative Manuel ta nupay saan pay a nakaungar iti krisis ti edukasion ti pagilian ket nakissayan pay ti budget dagiti ahensia nga addaan iti direkta a mandato a mangipasigurado iti pannakagun-od ken kalidad ti edukasion.
Impasingked da Castro ken Manuel a saan koma nga agsagaba dagiti estudiante, mangisursuro, ken education support personnel gapu iti mapapati a mapagduaduaan nga aramid ti dati a sekretario ti DepEd a ni Bise Presidente Sara Duterte.
