LA UNION – Makapadanag unay ken saanen nga umno dagiti nagbalin a rakurak ni Vice President Sara Duterte a nang-kontrata iti assassin a mangpatay kenni Presidente Ferdinand Marcos Jr. no adda mapasamak kenkuana, segun kenni Senate President Francis “Chiz” Escudero.
Segun kenni Escudero, kas maikadua a kangatuan nga opisyal ti pagilian, kanayon a laglagipenna nga adda pagrebbenganna nga agbalin a pagwadan kadagiti staff-na iti Office of the Vice President (OVP), kadagiti Pilipino, ken kadagiti ubbing.
Nagpanawagan pay ni Escudero kadagiti kaalyado ni Duterte a balakadanda ti bise presidente a saan nga agisawang iti dakes a sarita, kalpasan ti “kill order” na iti presidente, First Lady Liza Araneta-Marcos, ken House Speaker Martin Romualdez.
Namnamaen ti Senate President a kumiddaw ti professional help ni Duterte nu marigatan tapno maaramid na a nasayaat iti trabahona kas bise presidente.
Impetteng ti senador, ti atension ken pigsa dagiti opisyales ti publiko ket maipamaysa koma iti pannakataming dagiti parikut a sangsanguen ti pagilian.
Impaganetget ni Escudero kenni VP Sara a repaswen dagiti statement ken aramidna kontra iti administrasyon.
Dagiti nagbalin a waragawag ni Duterte ket kasaruno iti bilin nga iyakar ti chief of staff-na a ni Undersecretary Zuleika Lopez iti Correctional Institution for Women idiay Mandaluyong City manipud House detention facility.
Kinuna ni Duterte a maysa nga “attempted homicide” ti nasao a transfer plan.
