Nasentensiaan ni US President-elect Donald Trump iti unconditional discharge gapu iti pannakakonbiktarna idi napan a tawen iti 34 counts of business fraud.
Nagtaud ti kaso kadagiti hush money payments kenni adult star Stormy Daniels tapno agulimek bayat ti 2016 presidential campaign.
Kayat a satwen ti unconditioinal discharge a saan a maibalud, mamulta wenno maipasango iti probation ni Trump ngem agtalinaed latta ti pannakakonbiktarna ken agbalinto a convicted felon.
Inrekomendar dagiti piskal ti nadakamat a sentensia kas panangted iti respeto iti opisina ti Presidente ken iti umay nga inagurasionna.
Tinabunoan ni Trump ti virtual hearing sadiay New York manipud iti pagtaenganna idiay Florida nu sadiay kinuna ni Judge Juan Merchan ng awan ti pabpaboranda a siasinoman uray ania ti posision ti maysa a tao iti gobierno.
Ibilang pay ni Merchan a naisangsangayan ti nadakamat a kaso gapu ta inkarigatanda a mangipablaak daitoy.
Immunan nga inbelleng ti kiddaw ti abogado ni Trump iti Korte Suprema a no mabalin ket maitantan ti sentensia kontra kenkuana gapu ta umas-asidegen ti panag-akemna kas presidente.
Nadiin ni Trump idi Marso 2023 iti Manhattan district attorney iti kaso a panagbayad na ti hush-money ti maysa nga adult film star a ni Stormy Daniels idi tawen 2016.
Idi Mayo 30, 2024, isu ket naduktalan a nakabasol iti amin a 34 counts a panangpalsipika kadagiti business records iti first degree babaen kadagiti 12 jurors.
Impaganetget dagiti piskal iti hearing a paset ni Trump ti illegal conspiracy a makadadael iti imahe ti eleksion.
Maipagarop a binilinna ti abogadona iti dayta a tiempo a ni Michael Cohen nga isubli ti $130,000 hush money ken bayadan ni Stormy Daniels tapno isardengnan ti agsarita maipapan iti relasionna kenni Trump a sigurado a mangdadael iti 2016 presidential bid-na.
Amin dagita nga alegasion ket nainget a pinagkedkedan ni Trump.
Idi Nobiembre 19, 2024, impakaammo ti Manhattan District Attorney’s Office kenni Judge Juan Merchan nga immanamongdan a mangitantan iti pannakasentensia ni Trump, a naikeddeng iti Nobiembre 26, nu kasta ket maipalubos ti umdas a panawen para iti litigation iti manamnama a motion to dismiss nga ipila ti kampo ti Presidente.
Idi nadanon ti Nobiembre 22, 2024, inkeddeng ni Judge Merchan ti indefinite postponement ti sentensia ken pinalubosanna ti kiddaw ni Trump a mangipila iti mosion a mangibasura iti kaso.
Idi Enero 3, 2025, inlaksid ni Merchan ti kiddaw ti kampo ni Trump a mangbasura iti kaso gapu iti panagballigina ti eleksyon idi Nobiembre.
