LA UNION – Natay ti maysa a construction worker bayat a nadundunor met iti kabsat na kalpasan a nabagbagsolan ditoy Siudad ti San Fernando.
Nabigbig ti pimmusay a biktima a ni Elmer Lubrin, agtawen-44, ken adaan asawa, bayat a nabigbig ti kabsatna a biktima met laeng a ni Arnold Lubrin, agtawen-33, agpada nga construction worker ken residente ti Purok 2, Barangay Pias, Siudad ti San Fernando, La Union.
Nabigbig met dagiti ag-ama nga suspek a managan Dario Balanon, agtawen-42, ken Daryl Balanon, agtawen-19, agpada met laeng a construction worker ken agnanaed idiay Barangay Namtutan iti isu metlaeng a siudad.
Maibasar ti imbestigasion ti San Fernando City Police Station, dagiti biktima ket naggapu idiay Barangay Bacsil idi bumaba da usar ti motorsiklo.
Kabayatan iti panagdaliasat da iti kalsada ket inovertake-an dagitoy ti maysa a kurong-kurong ken maipagarop a nagbugkaw ti maysa kadagiti biktima ti “Hoy! Agsilaw kayo!”.
Kalpasan ti panag-overtake ket agtultuloy metten ti panagbusina dagiti suspek. Idi nagsardeng dagiti biktima a mangkasao kadagiti dua a sakay ti kurong-kurong ket ditoy metten a kellaat a binagbagsolan da isuda.
Gapu iti insidente, dead on arrival ni Elmer Lubrin bayat a naiturong met ti ospital ti kabsat na a ni Arnold Lubrin.
Kabayatanna, agtultuloy paylaeng ti naun-uneg nga imbestigasyon dagiti pulis.
