BR LA UNION – Inawagan ni Vice President Sara Duterte a maysa a “crucifixion” ken bukod a “bloodbath” iti impeachment trial idiay Senado.
Daytoy ti imbaga ti bise presidente kabayatan ti press conference idiay The Hague, Netherlands idi Sabado, Mayo 31.
Kinuna na a dismayado iti interpretasyon ti publiko iti immuna a waragawag na a kayatna nga ituloy iti impeachment trial agsipudta kayatna ti maysa a “bloodbath.” Ngem kinondinar daytoy ni Rep. Lorenz Defensor kas dakes nga ehemplo kadagiti agtutubo.
Impaganetget ni Duterte, iti impeachment ket maysa a “political persecution” kenkuana kalpasan a naglosolos iti gabinete ti agdama nga administrasyon.
Kagiddan ti press conference, naisayangkat ti maysa a rally iti ruar ti Scheveningen Prison babaen kadagiti tagasuporta ni sigud a presidente Rodrigo Duterte nga adda iti kustodiya ti International Criminal Court (ICC).
Dimmar-ay pay iti nasao a rally da Senador Robin Padilla ken Imee Marcos.
Kabayatanna, nakatuding nga idatag idiay Senado iti Articles of Impeachment inton Hunyo 11, sakbay nga ag-adjourn iti 19th Congress inton Hunyo 13, 2025.
Naamwan a naitantan daytoy manipud Hunyo 2 tapno ipaayan dalan dagiti prayoridad a gakat.
Nupay mamati ni VP Sara a mabalin a saan a matuloy ti panagusig gaputi kinakurang ti oras, imbaga na a nakasagana iti legal team na a sangwen dagiti akusasyon.
Kabayatanna, inawagan ni VP Sara a “politically-motivated” iti panangkanselar ti Department of Justice iti pasaporte ni Atty. Harry Roque, a segun kenkuana, gapu daytoy iti panang-suporta na kenni FPRRD.
Ni Roque ket sumangsango iti kaso a human trafficking seknan iti operasyon ti Philippine Offshore Gaming Operator (POGO) hub a Lucky South 99, ken addaan pay ti arrest warrant manipud Angeles City Regional Trial Court.
