LA UNION – Natay iti maysa a 18-anyos nga estudyante ken siklista kalpasan a nadungpar iti maipagarop a nag-overtake a kotse iti kawatiwatan ti national highway, idiay Barangay Patac, Sto. Tomas, La Union.
Iti biktima ket nabigbig iti nagan a Cristine Trinidad, residente ti Barangay Tab-tabungao, Rosario La Union.
Nabigbig met iti respondent driver iti nagan a Karen Chan, 41-anyos, residente ti Goldendale Subdivision Barangay Tinajeros, Malabon City, Metro Manila ken nagmaneho iti kotse, addaan ti plate number, NPH 6065.
Segun kenni P/Cpl. Noli dela Cruz, imbestigador iti Sto Tomas Police Station, naka-bisikleta iti biktima kadwa dagiti gagayyem na nga agturong iti amianan a direksiyon idi nadalapus daytoy iti agpa-abagatan a kotse a maipagarop a nag-overtake iti sabali a behikulo.
Maibasar iti report, nagsagaba iti nakaru a pannakadundunor iti bagi ti biktima partikular iti ulo daytoy.
Naiturong iti La Union Medical Center idiay Agoo, La Union ngem indeklara ti attending physician a dead-on-arrival.
Kabayatanna, posible a saanen a maipursige ti kaso kontra kenni Chan kalpasan a napagnumwan iti dua a partido a mangipaay ti tulong iti respondent driver iti kantidad a P250,000.
