LA UNION – Natay iti dos-anyos nga ubing a babai idiay Barangay Boy-utan, Bauang, La Union gaputi maipagarop a panangkabkabil ti sioman na.

Iti biktima ket nabigbig a ni Missy Cassandra Jade Rivera bayat a ti suspek ket stepfather daytoy a managan Darwin Cortez, 21-anyos, awanan trabaho, ken residente iti nasao a lugar.

Napasamak iti insidente idi Mayo a-4 agdama a tawen ken maipagarop nga awan ti ina na idi napasamak ti insidente agsipudta adda iti trabaho.

Iti interview ti Bombo Radyo La Union kenni Pol. Major Renato Gacad, deputy-chief-of-police ti Bauang Police Station, kinuna na nga inaklon ti suspek iti imbestigador, a kinabil na iti ubing babaen iti panangdanog na iti tiyan daytoy iti namin-lima a daras, kalpasan a marurud iti panagsang-sangit ti biktima bayat a matmaturog.

Idi makita da a marigatan nga umanges iti ubing, inturong da iti Rural Health Unit idiay Bauang agingga nga inyakar ti ambulansiya idiay Naguilian District Hospital ngem indeklara ti doktor a dead-on-arrival.

Maipagarop a simmuko iti suspek idi Mayo 6 kalpasan a nagreport dagiti kaarruba ken kiniddaw da kadagiti otoridad a respondian iti ar-aramiden a panangmaltrato ti suspek iti ubing.

Ngem nawaya-wayaan met laeng kalpasan a saan a simrek iti inquest proceeding iti naipila a kaso a murder, nudiket nagbalin laengen a regular filing.

Kabayatanna, pormalen a nangidatag ti reklamo iti biological parents ti ubing.

Makasangit met nga imbaga iti biological father ti ubing nga ipat-pateg na unay iti anak na ket saan na a maaklon iti pannakatay daytoy.

Kinuna na nga agkasangay pay daytoy iti Hunyo 21 ket agtawen koman ti tallo.

Hustisiya met iti pannakatay ti ubing iti iyik-ikkis ti lola ti ubing a ni Anabelle Madera ket tarigagay na a maibalud ti suspek tapno bayadan iti inaramid daytoy a krimen.

Nakatuding a maitabon iti bangkay ni Missy ita nga aldaw, Mayo 11.

Iti agdama, maur-uray iti autopsy result iti bangkay ken nakatuding a maitabon ita nga aldaw ti Miyerkoles, Mayo 11.