LA UNION – Natay iti dua a tattao kalpasan a binagkong iti ag-ama a suspek idiay Barangay Sta. Monica, Agoo, La Union.
Napasamak ti insidente agarop alas 9:25 idi rabii idi Mayo a-12.
Dagiti biktima ket agkatugangan, isuda Edgar Morales, 50-anyos, ken Melchor Dacian JR, 30-anyos, agpada a residente iti nasao a lugar.
Dagiti met suspek ket ag-ama, da Condrado Dumo, 58-anyos, ken anak na a ni Richard Dumo, 28-anyos, residente ti Brgy. San Nicolas Central, Agoo, La Union.
Iti pannakiuman ti Bombo Radyo La Union kenni Police Cpl. Fidel Ramos ti Agoo Police Station ken imbestigador iti kaso, nagramot iti krimen iti simple a pannakibiang ti biktima a ni Edgar iti maipagarop nga innangaw ti suspek a ni Conrado ken iti sar-sarungkaran na a gayyem a managan Vic Mendoza.
Naamwan a ti grupo ti biktima ket ag-iinom iti dayta a gundaway bayat a ti suspek ket binisita na laeng iti gayyem na a ni Vic iti nasao a lugar.
Gapu it pannakibiang iti innangaw dagiti aggayyem, maipagarop a dinanog ti biktima a ni Edgar iti suspek a ni Conrado.
Nagawid iti suspek ngem nagsubli iti lugar kadwana iti anak na a ni Richard ken dadduma pay a kakadwa na, kasaruno iti pannaki-rambol dagitoy kadagiti biktima.
Nagsagaba ti dua a fatal wound iti tunggal biktima, naiturong da idiay La Union Medical Center idiay Agoo, La Union ngem naideklara a dead-on-arrival.
Iti insayangkat a manhunt operation ti Agoo Police, nakemmeg dagiti suspek iti mismo a pagtaengan da.
Idi kalman, naidatagen ti kaso a double murder kontra iti ag-ama a suspek.
Kabayatanna, imbaga ni Cpl. Ramos a siguden nga adda met laeng iti kapad-pada a kaso ni Conrado bayat nga iti anak na ket sigud nga addan ti kaso na maipapan iti iligal a droga wenno R.A. 9165.
