LA UNION – Umabot ti 27 a babbalay iti nauram ken dimmapo iti napasamak nga uram idi Hulyo 13, idiay Barangay Paringao, Bauang, La Union.
Umabot met ti 27 a pamilya a buklen iti 80 nga indibiduwal iti napukawan ti pagtaengan iti nasao nga uram.
Maipagarop nga awan pulos iti naisalbar a sanikua ken alikamen dagiti biktima ti uram, agsipudta awan ti tao a nabati kadagiti nasao a babbalay idi napasamak daytoy.
Naamwan a maysa a mangngalap a kailak-lakona ti bangka wenno fishing boat na, iti malidayan agsipudta nairaman ti kuwarta a naglakuan na a nauram, nga umabot ti P80,000.
Naamwan a malaksid nga adda kadagiti trabaho da dagiti kaadwan a biktima, dagiti met dadduma a miyembro ti pamilya ket adda iti barangay hall, partikular iti basketball court nga aga-ay-ayam.
Nupay kasta, awan iti naipadamag a nasugatan iti napasamak nga uram. Naaramid iti concrete ken light materials dagiti nauram a babbalay.
Base iti resulta ti initial investigation dagiti otoridad, maipagarop a nabaybay-an a nakasaksak a charger iti makagapo ti timpuar nga uram.
Saan pay met nga ammo iti pakabuklan a perdisyon wenno danyos iti nasao nga insidente.
Kabayatanna, dagiti biktima a pamilya ket temporaryo nga adda ita iti barangay hall ti nasao a barangay, ken agtultuloy dagitoy nga umaw-awat ti tulong.
