LA UNION – Natay dagiti tallo a menor-de-edad kalpasan a tamaan dagitoy ti kimat idiay Pulilan, Bulacan idi malem kalman.
Nabigbig dagiti biktima nga isuda: Rexter Enriquez, 16; Roxanne Enriquez, 12; ken April dela Cruz, 11-anyos.
Maibasar iti report, agay-ay-ayam dagiti tallo a biktima iti ruar ti balay da idi kellaat a nagtudo, naggarru-od ken nagkimat.
Istorya ti maysa a kasinsin da a nakalasat a ni Mark Salazar, naklaat met isuna iti napigsa a kimat ken nakita na laengen a nakadasay dagiti kasin-sinna ken umas-asok pay ti nauram a bagi dagitoy.
Naiturong pay iti ospital dagiti biktima, ngem nai-deklara dagitoy a dead on arrival.
Segun iti palawag ti PAG-ASA, mabalin a natay dagiti biktima gaputi ground current.
Pagan-annaden ti state weather bureau iti publiko nga agbalin a naannad iti panag-digos ti tudo nangruna nu adda panagkimat.
