LA UNION – Awan pulos ti naisalbar a kagamitan dagiti uppat a pamilya a karaman iti uram a napasamak iti Barangay San Francisco ditoy ciudad ti San Fernando.
Daytoy ti inbatad ni Fire Chief Inspector Jun Eland Wanawan – City Firemarshal iti Bureau of Fire Proctection, San Fernando City, La Union.
Segun ken Wanawan, awan met ti nasugatan apaman ti napasamak nga uram no sadinno nga agarup 60 sq. meters ti total area ti uppat a pagtaengan a pagnanaedan ti uppat a pamilya.
Apaman ti panagresponde da ket nakipagtinnulong met ti Bureau of Fire Proctection ti Provincial Government ti La Union, ti fire truck ti Philippine Airforce, La Union ken Chinese Volunteers.
Mainaig iti daytoy, ket nagbayag ti uram iti las-od ti maysa oras, ken ti kitkitaen da a namunganayan ti uram ket gapu iti maipagarop a panag-welding.
Iti agdama ket mannarimaan pay laeng ti imbestigasyon iti tapno maamwan ti kadagupan a gatad dagiti nadadael ti uram.
Inpakaammo met ni Wanawan, nga insigida met a nangipaay ti Local Government unit ti San Fernando City ken ti Provincial Government of La Union iti tulong kadagiti nagbalin a biktima babaen ti panangidaulo ni Gov. Raphaelle Veronica “Rafy” Ortega-David.
Iti agdama ket nagturong pay laeng dagiti biktima kadagiti kabagyan da.
Kabayatanna, nagballaag ni Wanawan iti publiko nga agbalin a responsable nangruna kadagiti mabalin a pamunganayan ti uram nangruna ita a panawen ti kalgaw.
