LA UNION – Uppat a puwesto wenno shop a pakaibilangan iti radiator shop, automotive and repair shop, ken maysa a sari-sari store, iti nauram idi rabii, Agosto 18, 2022 iti Purok 4, Barangay Sevilla, San Fernando City, La Union.
Segun kenni Ismael Cacanindin, anak ti agpapaabang kadagiti nasao a shop, immuna a nakita da ken ti kabsatna, iti asok a maipagarop a nagtaud iti hydraulic hose iti maysa a puwesto, agingga a timpuar ti apoy ken napartak a nagramaram kadagiti kaabay daytoy a shop.
Dagus met a nagresponde dagiti bombero ditoy siyudad ti San Fernando ngem gaputa flammable wenno nalaka a mauram iti kaadwan a tagilako kadagiti nasao a shop, isutgapuna a napartak a nagkayamkam ti apoy.
Saan pay nga ammo iti pakabuklan a gatad dagiti nadadael wenno danyos iti napasamak nga uram.
Nupay kasta, awan ti naipadamag a nadangran wenno nadunor iti nasao nga insidente.
Agtultuloy iti imbestigasyon dagiti otoridad tapno duktalen iti pudno a makagapo ti timpuar nga uram.
Kabayatanna, nanggubway ti insidente iti nairut a taray ti trapiko agsipudta dagiti nauram a puwesto ket masarakan iti akin-daya a paset iti ngalay ti national highway wenno abagatan a paset ti maysa a dackel a mall iti Barangay Sevilla.
