LA UNION – Ur-urayen laengen ti pamilya Cabanban idiay Barangay Talogtog, San Juan, La Union iti abiso manipud DFA wenno iti Manila Economic and Cultural Office (MECO) idiay Taiwan, iti petsa a pannakaiyawid ti bangkay ni Sheryl Gacutan Cabanban.
Maipalagip a ni Cabanban, 28-anyos, ket nagtrabaho kas maysa a factory worker idiay Taiwan, sipud tawen 2017 ket natay idi impasngayna iti maladaga a babai, gaputi maipagarop a blood loss wenno adu ti dara a napukaw kenkuana.
Iti pannakiuman ti Bombo Radyo La Union kenni Barangay Chairperson Arlene Abat, kinuna na a naipakaammo dan ti tarigagay da a maiyawid iti bangkay a saan a ma-cremate, ngem iti maladaga kunana ket maud-udi agsipudta kasapolan a sukunen daytoy iti cacabagyan wenno pamilya ni Cabanban ditoy Pilipinas.
Pinagyamanan ni Abat iti Bombo Radyo, iti Provincial Government of La Union, DFA, PSA, ken MECO Taiwan kadagiti tulong tapno maiproseso iti panangiyawid ti bangkay ni Sheryl manipud Taiwan.
Kinumpirma ni Abat, a dagus a nangipaay ti tulong pinansiyal iti opisina ni Outgoing Governor Pacoy Ortega III iti pamilya Cabanban a mausar iti panangiyawid ti bangkay.
