LA UNION – Agkidkidaw ti tulong ni Cesar Cabanela manipud Barangay Casilagan, San Juan, La Union kalpasan a natakaw iti lima a taraken na a kalding idi Miyerkoles, Mayo 29.
Sigun ken Cabanela naklaat isuna idi nagturong iti kulungan nga ayan dagiti taraken na a kalding idi maduktalan na a kurang ti lima dagiti sangapulo ket pito a taraken na.
Mapatta patta nga agbalor ti nasurok kumurang trenta mil ti gatad dagiti natakaw a taraken na a buklen ti uppat a kabakyan ken maysa a bulog.
Patien ni Cabanela nga inlugan dagiti mannibrong iti traysikel wenno kurong kurong dagiti tinakaw da a kalding kalpasan a nakitana ti tugot ti pilid asideg iti kulangan dagiti taraken na.
Maipalagip nga adda met laeng ti kapada nga insidente itay kallabes ita a bulan iti nasao met laeng nga ili.
Nagpalagip met dagiti otoridad a no adda kabalinan iti lugar nga asideg ti babbalayda iti pangipasdekan ti kulungan dagiti taraken da ken mangikabil ti silaw tapno iti kasta mapabutngan dagiti agtatakaw.
