LA UNION – Nadunor iti pito a suldado ken maysa iti maipagarop a naputdan ti ramay gapu iti inaramid a nadursok nga aksiyon ti Chinese forces iti barko ti Pilipinas bayat a mangisay-sayangkat ti resupply mission iti BRP Sierra Madre, idi Ayungin Shoal idi Lunes, Hunyo 17.
Maibasar iti statement ti China Coast Guard iti China Daily, limmugan ti Chinese forces iti resupply boats ti Phil. Navy ket nangisayangkat da ti inspeksiyon sakbay da a pinapanaw ti Philippine vessels idiay Ayungin Shoal.
Maipagarop nga adda napasamak a dinnanog iti baetan ti puwersa ti Pilipinas ken Chinese forces a nakasugatan dagiti pito a suldado ken nakaputdan ti ramay iti maysa.
Innala pay ti Chinese Coast Guard iti walo a high-powered firearms ti Philippine forces ken inabutan da iti rigid hull inflatable boat (RHIB).
Malaksid dayta, maipagarop pay a hinostage da iti uppat a rigid hull inflatable boat ngem rinuk-atan da met laeng kalpasan ti negosasyon.
Gaputi insidente, awan kadagiti innem a nai-deploy nga inflatable boat ti Pilipinas ti nakadanon iti outpost idiay BRP Sierra Madre.
Kabayatanna, saan pay a nangiruar ti opisyal a waragawag iti gobyerno ti Pilipinas iti nasao a nadursok nga aksyon ti China kontra iti puwersa ti pagilian idiay West Philippine Sea.
Uray iti Philippine Coast Guard (PCG) ket nagkedked a mangipaay ti waragawag, agsipudta maipagarop a saan da a mangipapaay ti statement para iti anyaman nga aksyon wenno development iti biang ti militar.
