LA UNION – Inarestar dagiti kameng ti Rosario Police Station iti maysa a 73-anyos a lakay gaputi kaso a panaglabsing iti R.A. 10591 wenno “Comprehensive Firearms and Ammunition Regulation Act”.
Nabigbig ti suspek iti nagan a Leonardo Caoile Sr., addaan ti asawa, residente ti Barangay Vila, Rosario, La Union.
Naarestar ni Caoile iti mismo a balay na kalpasan iti naiyemplementar a search warrant nga impaulog ni Judge Ethelwolda Jaravata ti RTC Br 32 idiay Agoo, La Union.
Nagresulta daytoy iti pannaka-rekobre ken pannaka-kumpiskar dagiti otoridad iti nagduduma a klase ti paltog, a pakaibilangan ti cal. 38, cal. 22, airgun, oxygen tank, 20 a pidaso ti super pellet wenno bala ken dadduma pay.
Dagus a naipasidong iti custodiya ti Rosario PNP iti suspek para iti pannakaipila ti maiyannatop a kaso.
